شناهيا السيفتي كار؟

MB-SLS-SafetyCar-05

شناهوا دور السيفتي كار في الفورمولا1 و علاش كاتدخل للسيركوي شي مرات؟

السيفتي كار هي سيارة الأمان، كاتدخل للسيركوي أي الحلبة ملي كايكون شي حدث / حادث فيه خطر على السائقين ولا على عمال الحلبة (المارشالات) و كاتخرج قدام المتصدر باش تنقص من سرعة السيارات و يدورو بشوية حتى ينتهي الخطر.

بزاف ديال الحالات كاتخج فيهم السيفتي كار للحلبة. منها شي حادث اللي خلا أشلاء و قطع من شي سيارة على الحلبة، أو مثلا توقف شي سيارة في بلاصة خطيرة وسط الحلبة، أو ملي كاتصب الشتا أكثر من القياس و كاتولي القيادة صعيبة. و هنا كاين بعض الحالات مثلا: إذا كانت الشتا قبل بداية السباق غزيرة جدا، الإنطلاقة كاتكون ورا السيفتي كار. حتى تخرج من الحلبة عاد يبدا التسابق و هذا ما يعرف بالإنطلاقة المتحركة. أما إذا كانت الشتا بزاف وقت السباق و استمرت بقوة يمكن تبقا السيفتي كار على الحلبة حتى ينتهي السباق.

السيفتي كار كاتدخل للحلبة بأمر من مدير السباق السي شارلي وايتين. و ملي تدخل كاتشعل واحد البولا عند ﯕـاع السائقين داخل سياراتهم. كاتخلي السيفتي كار كلشي يدوز حتى يجي وراها المتصدر و يتصافو وراه باقي المتسابقين على حسب ترتيب السباق. و ملي كاينتهي السبب علاش دخلت (ملي يهزو الطوموبيل المفرشخة ولا يجريو على الكلاب اللي دخلو بحال في الهند) كايطفاو الاضواء اللي فوق منها باش تنبه الجميع أنها غاتخرج من الحلبة في هاد الدورة. و ملي تخرج المتصدر هو اللي كايحدد لحظة الانطلاق ما بين خروج السيفتي كار و المرور على خط البداية.

استراتيجيا، السيفتي كار كاتساعد مرات و كاتخسّر مرات. مثلا سائق كان فايت باقي السائقين ولا متصدر بشي فارق كبير كاتدخل السيفتي كار كاترجع كلشي متقارب بحال الانطلاقة الشيء اللي كايضرب ليه كلشي في الزيرو، بينما يمكن تخدم واحد آخر اللي مثلا كان خاصو يتوقف يبدل البنوات و ما توقف حتى دخلت السيفتي كار و لأن باقي السيارات مجبورين ينقصو من سرعتهم هو غادي يربح ثواني كثيرة و يخرج قدامهم.

السيفتي كار الحالية و منذ 2010 هي:

Mercedes SLS AMG

 السائق ديالها هو الألماني بيرد مايلاندر متسابق قديم في البطولة الألمانية المحلية دي تي إم. و بالمناسبة راه هو داك البوكوص اللي في الصورة أعلاه ههههه

طبعا السيفتي كار حتى هي عرضة للحوادث، بحال كيما غادي نشوفو مع نيك هايدفلد الالماني:

(https://twitter.com/NickHeidfeld)

و في بعض الأحيان عوض ما تكون السيفتي كار سيارة أمان كاتولي سيارة خطر على المجتمع.. سولو الياباني تاكي إينوي يعاود ليكم الخبار

(https://twitter.com/takiinoue)

Advertisements

2 responses to “شناهيا السيفتي كار؟

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google+ photo

You are commenting using your Google+ account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s