اللي دار الدنب يستاهل العقوبة

قاعة الحكام. عندهم شلة تلفازات ولاد ديل الكلب!.. آراوش وحيدة

إيه آ سيادنا! السباق ماشي سايب و عندو دستورو الديمقراطي. الديكتاتوري في بعض الأحيان. المتسابقين كايتعرضو للعقوبة قبل أو أثناء أو بعد السباق على أي خرق للقانون ولا شي سلوك غير رياضي في حق بعضياتهم. العقوبات كاتكون إما تأثير على المركز ديال السائق أو ترتيبو أو كاتكون عقوبة مالية عليه ولا على الفريق ككل. نبداو بسم الله

Drive Through Penalty

هاد العقوبة ديال المرور من منطقة الـﯕـاراجات. السائق كايدخل و يمشي بسرعة 100 كلم/س من قدام الـﯕـاراجات و كايخسر فيها 15 حتى لـ20 ثانية ديال الوقت

Stop And Go Penalty

هاد العقوبة كاتشبه للعقوبة أعلاه، و لكن السائق خاصو يتوقف ﯕـدام ﯕـاراج فريقو 10 الثواني قبل مايتحرك. و ممنوع الفريق يقرب ليه (لا تبدال بنوات لا والو)ـ

العقوبتين أعلاه كايخصها تتأدى خلال 3 دورات من لحظة إعلام السائق، ولا يوريوه العلام الكحل

Time Penalty

في حالة ما الشيفور تعطاتو عقوبة في آخر 5 دورات، التحذير ديال 3 دورات ماكايبقاش ساري المفعول. ولا خونا كمل السباق بلا مايدخل كاتطبق عليه “تايم بينالتي” يعني الوقت اللي كمل فيه السباق كاتزاد عليه من 5 حتى 30 ثانية حسب فداحة الجريمة سيدي القاضي

Grid Penalty

هاد العقوبة ديال إرجاع كذا مركز في الإنطلاقة. إذا شي واحد خرق القانون الرياضي أو التقني قبل يوم السباق (في التجارب أو التأهيل) كاتجيه هاد العقوبة و حسب الجرم يقدر يرجع 5 أو 10 مراكز للخلف من ترتيب التأهيل ديالو. و في بعض الحالات يتلاح للمركز الأخير ﯕـاع أو ينطلق من الـﯕـاراج (الإنطلاقة من الـﯕـارج خاص المتسابق ماينطلق حتى يدوز صاحب المركز الأخير من الفيراج الأول). أما إذا ماتطبقاتش العقوبة السالف ذكرها أعلاه (تايم بينالتي) كايتعطا للسائق عقوبة إرجاع مراكز للسباق الجاي

بالنسبة للمم و صغار الدنوب اللي ما كاتستدعيش أي عقوبة من العقوبات أعلاه، كاين الإندار. اللي جمع 3 الإندارات كاياخد إرجاع 10 مراكز للخلف. و ابتداء من 2014 غايبدا نظام النقاط ديال البيرمي. حسب الفعل كايتحيدو النقاط من البيرمي ديال الإف1 و اللي مشات ليه 12 نقطة كايمشي ليه الحق ديال المشاركة في السباق الموالي. النقاط كايرجعو للزيرو في بداية كل موسم

بالنسبة للغرامات المالية هي كاتطبق على السائق و الفرق في بعض الحالات، مثلا: الطاقم ديال الـﯕـاراج ما ركبش شي بنو كما ينبغي أو طلقو الشيفور و في الطريق ديال واحد اخر جاي لـﯕـاراجو، أو السائق خسر الهضرة ولا قلز لشي حد أو مارجعش الطوموبيل من بعد نهاية شي حصة.. العقوبة كاتكون من 25 الف حتى لـ50 ألف يورو.