ما بقا ﯕـد ما فات

dcd1427fe405

قربات بداية الموسم من استراليا و بقا غير 11 يوم على انطلاقة أول سباق يوم الأحد 16 مارس في هاد الموسم الجديد مع قوانينو الجديدة اللي غاتعطي شي مفاجئات ما كانتش في الحسبان و غاتقلب موازين القوى. و من بعد ما انتهت 12 يوم من التجارب الشتوية قبل الموسم بدات كاتوضح الصورة لحد ما و بدا يبان شكون تأقلم بسرعة مع القوانين الجداد و شكون باقي خاصو الوقت و الخدمة.. و الزهر

أولا الفرق المزودة بوحدات الطاقة (الموطور + التيربو + البطارية) ديال مرسيدس بان عندها امتياز. مرسيدس و ويليامز سيطرو على الأوقات و ضربو بزاف ديال الكيلومترات بلا مشاكل و كلشي كايـﯕـول أنهم مرشحين يربحو السباق الأول. ماكلارين كايبانو عندهم السرعة و لكن ماشي بحال من سبق ذكرهم. و فريق فورس إنديا باين انهم خطاو خطوة الـﯕـدام من بعد بزاف ديال المشاكل التقنية.

الفرق اللي عندها وحدات الطاقة ديال فيراري بانت شوية ناقصة في القوة، و طبعا فريق الشركة الأم اللي هو سكوديريا فيراري عندو بعض المشاكل خصوصا ان الموطور شاكين فيه كاياكل ليصانص أكثر من مرسيدس. و لكن في السرعة فيراري كايعاودو عليها تقدر تكون مباشرة ورا ويليامز و مرسيدس و تنافس ماكلارين. فريق ساوبر دوز تجارب شوية ساكتة ما عارفهم حد اشنو دارو في البرنامج التجريبي ديالهم. أما ماروسيا فريق المؤخرة باين أنهم لقاو شوية ديال السرعة و ماغادينش يبقاو هوما الأخيرين.

أما الفرق اصحاب وحدت الطاقة رونو، اللي هوما ريدبول أبطال العالم لآخر 4 مواسم، و شقيقتهم الصغيرة تورو روسو، و فريق لوتس و فريق كاترهام، فإنهم لقاو راسهم في مشاكل ما عندها بداية ولا نهاية. لأن مصنع رونو ماصنعش وحدة الطاقة قوية بما يكفي زيادة على المشاكل ديال التيربو و الحرارة ديال الباتري. ريدبول و تورو روسو شوية لقاو وقت فاش يدورو على الحلبة و لكن كل مرة يضربهم مشكل جديد.

الموسم غادي يكون حماسي بزاف في البداية ديالو قبل مايلقاو بعض الفرق شي حلول و يتحدد واحد الترتيب. و هادشي مزيان للرياضة لأن سيطرة فريق واحد لمدة طويلة كايجيب الملل. زيادة ان ﯕـاع هاد الحلول و التكنولوجيات غاتلقا طريقها للسيارات العادية بلا شك.

Advertisements

One response to “ما بقا ﯕـد ما فات

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s