نهار الحد داز سباق أستراليا في ميلبورن على حلبة ألبيرت بارك. السباق كان عامر بالأحداث من البداية حتى للنهاية و أيضا ما بعد النهاية.
البريطاني لويس هاميلتون كان انطلق من البول بوزيشن و لكن مع الانطلاقة عرفو عندو مشكل أن سيلاندر ماخدامش و بقاو غير خمسة. داكشي علاش دار غير ثلاثة الدورات و انسحب باش يحمي الموطور لأنه عندو غير خمسة المحركات في العام. الزميل ديالو الألماني نيكو روزبرﯕ ربح السباق بسهولة تامة حيت سيطر من الانطلاقة حتى لخط النهاية بلا ماينافسو أي واحد. الفريق الوحيد اللي كان يقدر ينافس مرسيدس اللي هو فريق ويليامز دارو تأهيل كارثي و في الانطلاقة تعرض فيليبي ماسا لحادث خرجو من السباق. بينما السائق التاني فالتيري بوتاس كان غادي مزيان حتى قاس الحيط و فرﯕـع البنو و رجع أخير.. قبل مايعاود يتجاوز شلة سيارات و يدخل سادس. سادس اللي تحولات لخامس بعدما لغات اللجنة نتيجة المركز الثاني للاسترالي دانييل ريكاردو ديال ريدبول لأن التحقيق كشف أنهم ما احترموش معدل صبيب الوقود للمحرك اللي هو 100 لتر في الساعة.
السائق الجديد الدنماركي كيفن ماﯕـنوسن و زميلو في ماكلارين البريطاني جنسون باتن كملو السباق ثاني و ثالث. بينما الروسي دانيل كفيات الشيفور ديال تورو روسو كمل تاسع و خاد جوج نقط و بالتالي ولا أصغر سائق يسجل نقاط في التاريخ. عندو تسعطاشر عام و شي ايامات.
بطل العالم الرباعي السي سيباستيان فيتل حتى هو طرا ليه مشكل في الموطور و انسحب من بعد خمسة الدورات. بينما ثنائي الفيراري فرناندو ألونسو و كيمي رايكونن كملو السباق رابع و سابع. كيمي كان عندو مشكل في الفران ديال اللور لأن الياباني كاموي كوباياشي (مسخوط الواليدين) ملي دخل في فيليبي ماسا قاس رايكونن هو الأول.. بداية كارثية لفيراري بحال آخر ثلاثة مواسم…
السباق الجاي غايكون في ماليزيا أيام 28 و 29 و 30 مارس، في حلبة سيبانـﯕ و اللي ديما فيها الشتا في السمايم و الليالي. يعني غادي يكون شي سباق كارثي فيه نتائج غير متوقعة عاوتاني.
مدونة الفورمولا 